Eiseválddiid rávvagat dronaáiccastagaid várás
Eiseválddit ja stáhtanjunnošat čuvvot ja nohkot dorvvolašvuođa dili nuppástusaid ja sihkkarastet, ahte min servodahkamet doaibmá visot diliin. Supmii ii čuoze dálá dilis militearalaš uhkki.
Dán dieđáhusa ulbmil lea dávistit dili bohciidahttin gažaldagaide. Árrodilis du veadjin lea sihkkareabbo ja dorvvoleabbo, go dieđát mot bargat.
Eahpedábálaš dronaáiccastagat dutkojuvvojit álohii
Boles ja eará eiseválddit gaskkustit aktiivvalaččat dorvvolašvuođa dili ovdáneamis ja nuppástusain sihke árro- ja heahtediliin. Boles čielggada dasa dieđihuvvon eahpedábálaš dronaáiccastagaid. Dábálaččat áiccastagat laktásit dronaid girddiheapmái krihtalaš infrastruktuvrra lahkosiin dehe áibmojohtalusas gildojuvvon dehe ráddjejuvvon guovllus. Váldooassi dieđihuvvon áiccastagain sáhttá čilgejuvvot ovdamearkka dihte dronaájanasain dehe girdijohtolagain.
Várain váruhuvvo várradieđáhusain dehe álbmotčerggoniiguin
Álbmoga váruheami ovddasvástádus lea doaibmaválddálaš eiseválddiin ja váruheapmi vuođđuduvvá máŋggakanálavuhtii. Uhkideaddji váras váruhuvvo várradieđáhusain ja/dehe álbmotčerggoniiguin. Várradieđáhus almmustuhttojuvvo rádios ja 112 Suomi -áppas sihke dárbbu mielde maid televišuvnnas. Dasa lassin várradieđáhus boahtá oidnosii Teaksta-TV siidui 112.
Uhkideaddji váras sáhttá váruhuvvot maid álbmotčerggoniiguin. Almmolaš várramearka lea minuhta guhkkosaš badjáneaddji ja luoiti jietna dehe gulahemiin addojuvvon váruhus. Go almmolaš várramearka čuodjá, de galgá ohcalit suodjái sisa.
Várra meaddel -mearka lea minuhta guhkkosaš dássedis jietnamearka. Dat dieđiha, ahte uhkki dehe várra lea meaddel.
Sisáššiidministeriijas lea vuolgán johtui prošeakta, mas Heahteguovddášlágádus 112 Suomi -áppai ovdánahttojuvvo ođđa iešvuohta, mii dieđihivččii váras, mii boahtá áimmu mielde.
Ná suddjet iežat sisa
Mana sissajiide, juos oaččut várradieđáhusa vejolaččat váralaš dronas dehe oainnát dehe gulat drona, man doaibma spiehkasta dehe lea fuola bohciidahtti (omd. girdá gildojuvvon guovllus dehe hui vuollin). Sissajiin gánnáha orodit vistti gaskaosiin ja bissut guhkkin eret lásiid lahka.
Juos it beasa sissajiide, oza nu suoddjás báikki go vejolaš.
Dieđit áiccastagas dárbbu mielde heahtenummárii
Oaččut eiseválddi gaskkustan várradieđáhusaid njuolga iežat telefonnummárii 112 Suomi -áppain iežat sajádaga vuođul. Sihkkarastte, ahte leat addán áppai lobi čuovvut iežat sajádaga ja sáddet dieđáhusaid, vai oaččut visot iešvuođaid iežat atnui. Installere 112 Suomi -áppa iežat telefovdnii áppagávppis (App Gallery, Google Play, App Store).
Čuojat heahtenummárii 112, juos
- dagat áiccastaga drona guovlluin, main girddiheapmi lea gildojuvvon
- drona girdá dehálaš čuozáhaga lahka, mii lea omd.:
- fápmorusttet
- girdišillju
- hámman
- čáhceráidnenrusttet
- stuora diehtojohtolat- dehe eiseváldivisti
- gávnnat eatnamii gahččan drona.
Vástit heahteguovddášfávtta gažaldagaide ja doaimma iežat oažžun rávvagiid mielde.
Diđoštallančuojaheamit, mat laktásit dorvvolašvuođa dillái, eai galgga dahkkojuvvot heahtenummárii 112.
Bargga ná, juos gávnnat gahččan drona dehe oainnát girdi drona
Juos gávnnat eatnamis eahpidahtti drona dehe dan osiid, mana dorvvolaš gaskka duohkái ja čuojat heahtenummárii 112. Vástit heahteguovddášfávtta gažaldagaide ja doaimma iežat oažžun rávvagiid mielde. Ale luoitte earáid gávdnon biergasa lahka. Ale juoge iežat sajádaga dehe govva dronas sosiálalaš medias.
Juos dagat áiccastaga dronas krihtalaš infrastruktuvrra lahkosiin dehe girdi gielddusguovllus, árvvoštala dili ja doahttal várrugasvuođa. Čuojat dárbbu mielde heahtenummárii 112 ja dieđit iežat áiccastagas. Vástit heahteguovddášfávtta gažaldagaide ja doaimma iežat oažžun rávvagiid mielde. Sihkkarastte iežat dorvvolašvuođa ja mana dárbbu mielde lagamus sissadjái eret uvssaid ja lasiid lahka. Čuovo eiseválddiid gaskkusteami.
Dieđut ja dáiddut leat ráhkkaneami dehálaš oassi. Iežat veadjin lea sihkkareabbo ja dorvvolaččat, go dieđát mot doaibmat sierra diliin.