Veʹrǧǧniiʹǩǩi vuäʹppõõzz droonvuâmmšõõzzi vääras
Veʹrǧǧneeʹǩǩ da riikkjååʹđteei seuʹrrje da oudlkâʹstte staanvuõttvueʹjj muttsid da ainsmâʹtte, što mij õhttsažkåʹdd toiʹmmai pukin vuõʹjjin. Lääʹddjânnam årra ij ohjjõõv tän poodd sääldatlaž vaarr.
Tän teâđtõõzz mieʹrren lij vaʹstteed vueʹjj diõtt šõddâm kõõččmõõžžid. Heâmmõsvueʹjjest tuu åårrmõš tåbddai snäätnʼjubun da staanʼjubun, ko teâđak, mäʹhtt tåimmad.
Čårstõõǥǥlaž droonvuâmmšõõzzid tuʹtǩǩeet pâi
Pååʹles da jeeʹres veʹrǧǧneeʹǩǩ saaǥǥte aktiivlânji staanvuõttvueʹjj ouddnummšest da muttsin di heâmmõs- da jieʹttvuõʹjjin. Pååʹles čiõlǥat tõõzz iʹlmmtum čårstõõǥǥlaž droonvuâmmšõõzzid. Takainalla vuâmmšõõzz õhttne drooni ǩeeʹrdtummša kriittlaž infrastruktuur õlddsin leʹbe äimmjååttmõõžžâst ǩiõlddum leʹbe rääʹjtum vuuʹdest. Väʹlddvueʹss iʹlmmtum vuâmmšõõzzin õhttan ouddmiârkkân droonstaarjõʹsse leʹbe ǩeʹrddemjååttlõʹǩǩe.
Vaarâst vaartet vaarrteâđtõõzzin leʹbe narodvaarteeʹjivuiʹm
Narood vaartummšest vaʹstteei tåimmvälddsaž veʹrǧǧneeʹǩǩ da vaartummuš vuâđđâʹvve määŋgkanaalʼlažvuõʹtte. Aʹštti vaarâst vaartet vaarrteâđtõõzzin da/leʹbe narodvaarteeʹjivuiʹm. Vaarrteâđtõõzz õlmstââʹttet radiost da 112 Suomi -suåvldõõzzâst di taarb mieʹldd televisiost še. Lââʹssen vaarrteâđtõs eett Teʹkstt-TV sijddu 112.
Aʹštti vaarâst vueiʹtet vaartet še narodvaarteeʹjivuiʹm. Takai vaarrmiârkk lij minuutt kokksaž pâjjneei da luâšttõõtti jiõnn leʹbe kuulteeʹl uvddum vaartõs. Ko takai vaarrmiârkk čuâjj, suõjjõõđât sizz.
Vaarr lij rääi -miârkk lij minuutt kokksaž tässʼsaž jiõnnmiârkk. Tõt iʹlmmat, što äšttmõš leʹbe vaarr lij rääi.
Siiʹsǩministeriast lij älggam haʹŋǩǩõs, mâʹst Jieʹttkõõskõs-stroiʹttel 112 Suomi -suåvldõʹsse oouʹdeet ođđ jiõččvuõđ, kååʹtt vaarteʹči ääimast aʹštti vaarâst.
Nääiʹt suõjjõõđak sizz
Mõõn siiʹsǩsõõʹjid, jõs vuäǯǯak vaarrteâđtõõzz vueiʹtlvânji vaarlaž droonâst leʹbe vuäinak leʹbe kuulak droon, koon toiʹmmjummuš lij čårsteei leʹbe huõl counni (ouddm. ǩeârdd ǩiõlddum vuuʹdest leʹbe samai vueʹllen). Siiʹsǩsõõʹjin lij pueʹrr åårrad põõrt kõskkvueʹzzin da põõššâd kuʹǩǩen ikknin.
Jõs jiõk piâzz siiʹsǩsõõʹjid, ooʒʒ nuʹtt sueʹjes pääiʹǩ ko vueiʹtlvaž.
Iʹlmmet vuâmmšõõzzâst taarb mieʹldd jieʹttnââmra
Vuäǯǯak veʹrǧǧniiʹǩǩi vuõltteem vaarrteâđtõõzzid vuõiʹǧǧest tuu teʹlfooʹne 112 Suomi -suåvldõõzz veäkka tuu sâjjõõzz vuâđald. Ainsmââʹtt, što leäk ouddam suåvldõʹsse lååʹv seuʹrrjed tuu sâjjõõzz da vuõltteed iʹlmmtõõzzid, što vuäǯǯak puk jiõččvuõđid ââʹnnemnalla. Laadd 112 Suomi -suåvldõõzz tuu teʹlfooʹne suåvldõskaaupâst (App Gallery, Google Play, App Store).
Soiʹtte jieʹttnââmra 112, jõs
- vuâmmšak droon vuuʹdin, koin ǩeeʹrdtummuš lij ǩiõlddum
- droon ǩeârdd tääʹrǩes sââʹj ââlda, mâʹte:
- viõkkstrooiʹtel
- ǩeʹrddemǩeʹdd
- sätkk
- čääʹccpuʹtstempäiʹǩǩ
- jõnn teâttjååttlõk- leʹbe veʹrǧǧneǩraajâlm
- kaaunak maddu kõččâm droon.
Vaʹstted jieʹttkõõskõskooʹcci kõõččmõõžžid da tååim tuu vuäǯǯam vuäʹppõõzzi mieʹldd.
Staanvuõttvuâkka õhttneei teâđstõõllâmsååitaid ij õõlǥ soiʹttjed jieʹttnââmra 112.
Tååim nääiʹt, jõs kaaunak kõččâm droon leʹbe vuäinak ǩiʹrddi droon
Jõs kaaunak määddast huõl counni droon leʹbe tõn kuuʹsǩid, mõõn staaʹnes kõõsk ǩeäčča da soiʹtte jieʹttnââmra 112. Vaʹstted jieʹttkõõskõskooʹcci kõõččmõõžžid da tååim tuu vuäǯǯam vuäʹppõõzzi mieʹldd. Jeäʹl lueʹšt jeärrsid kaunnum kääuʹn ââlda. Jeäʹl jueʹjj tuu sâjjõõzz leʹbe snimldõõǥǥ droonâst sosiaalʼlaž mediast.
Jõs vuâmmšak droon kriittlaž infrastruktuur õlddsin leʹbe ǩeʹrddemǩiõldvuuʹdest, ärvvtõõl vueʹjj da jääʹǩǩet vaarčõsvuõđ. Soiʹtte taarb mieʹldd jieʹttnââmra 112 da iʹlmmet tuu vuâmmšõõzzâst. Vaʹstted jieʹttkõõskõskooʹcci kõõččmõõžžid da tååim tuu vuäǯǯam vuäʹppõõzzi mieʹldd. Ainsmââʹtt jiijjad staanvuõđ da mõõn taarb mieʹldd ââldmõs siiʹsǩsâjja meädda uusi da ikkni ââlda. Seuʹrre veʹrǧǧniiʹǩǩi saaǥǥtummuž.
Teâđ da tääid lie tääʹrǩes vueʹssen vaʹrrjõõttmõõžžâst. Tuu åårrmõš tåbddai snäätnʼjubun da staanʼjubun, ko teâđak, mäʹhtt tåimmad jeeʹres vuõʹjjin.