Virgeomâhái ravvuuh drooniaiccâmušâi tiileest
Virgeomâhááh já staatânjunošeh čuávuh já munedisteh torvolâšvuotâtiilij nubástusâid já visásmitteh, et mii ohtsâškodde tuáimá puoh tábáhtusâin. Suomân ij čuosâ taan tiileest suáldátlâš uhke.
Taan tiäđáttâs ulmen lii västidiđ tilálâšvuođâ pajedem koččâmuššáid. Hemâdâstiileest tust lii vissásub já torvolub tobdo, ko tiäđáh maht toimâđ.
Spiehâstuvliih drooniaiccâmušah šaddeh ain tutkum
Poolis já eres virgeomâhááh viestâdeh aktivlávt torvolâšvuotâtile ovdánmist já nubástusâin sehe hemâdâs- já etitiilijn. Poolis seelvât toos almottum spiehâstuvlijd drooniaiccâmušâid. Táválávt aiccâmušah lohtâseh droonij kirdeetmân kriittisii infrastruktur aldasijn tâi áimujotoluvâst kieldum tâi räijejum vijđoduvâst. Váldu-uási almottum aiccâmušâi suijân lii ovdâmerkkân droonipuđâldâs tâi áimujotolâh.
Vaarâst váruttuvvoo varâtiäđáttâssáin tâi aalmugviehâlarmâdeijeiguin
Aalmugvievâ váárutmist västideijee toimâváldáliih virgeomâhááh já váruttem vuáđuduvá maaŋgâ uáli kevttimân. Äštee vaarâst váruttuvvoo varâtiäđáttâssáin já/tâi aalmugviehâlarmâdeijeiguin. Varâtiäđáttâs almostittoo radiost já 112 Suomi -heiviittâsâst sehe táárbu mield meid televisiost. Ton lasseen varâtiäđáttâs šadda uáinusân Tekstâ-TV sijđoid 112.
Äštee vaarâst puáhtá váruttiđ meid aalmugviehâlarmâdeijeiguin. Almolâš varâmerkkâ lii miinut kukkosâš pajaneijee já lyeštee jienâ tâi kullutmáin adelum váruttâs. Jis almolâš varâmerkkâ čuájá, te talle kalga suoijiidâttâđ siisâ.
Vaarâ lappâd -merkkâ lii miinut kukkosâš täsivis jienâmerkkâ. Tot almoot, et uhke tâi vaarâ lii lappâd.
Sisâministeriöst lii jođáskâm haahâ, mast Etikuávdášlájádâs 112 Suomi -heiviittâsân ovdeduvvoo uđđâ jiešvuotâ, mii váruttičij ááimust uhkedeijee vaarâst.
Tánávt tun suoijiidâđah siisâ
Sirduu siisâ, jis tun finniih varâtiäđáttâs máhđulávt varâlii droonist tâi uáináh tâi kuulah drooni, mon toimâm lii spiehâstuvlâš tâi šoddâd huolâ (om. kirdá kieldum vijđoduvâst tâi uáli vyeligâsâst). Viistijn siste lii pyeri orroođ rakânâs koskâoosijn já pisottâllâđ kukken laasâin.
Jis tun jieh peesâ siisâ, te uusâ nuuvt suáijáás saje ko máhđulâš.
Almoot aiccâmušâst táárbu mield etinumerân
Tun finniih virgeomâhái vuolgâttem varâtiäđáttâsâid njuolgist jieijâd puhelimân 112 Suomi -heiviittâssáin jieijâd sajaduv vuáđuld. Visásmit, et lah adelâm heiviittâsân love čuávvuđ jieijâd sajaduv já vuolgâttiđ almottâsâid, vâi tun finniih puoh jiešvuođâid kiävtun. Stellii 112 Suomi -heiviittâs jieijâd puhelimân heiviittâskäävpist (App Gallery, Google Play, App Store).
Suáiti etinumerân 112, jis
- tun aaicah drooni taggaar vijđoduvâst, kost kirdettem lii kieldum
- drooni kirdá tehálii čuosâttuv alda, tego:
- vyeimilájádâs
- kirdemkieddi
- haammân
- čäciputestemlájádâs
- stuorrâ tiätujotolâh- tâi virgeomâhâšrakânâs
- tun kaavnah enâmân koččâm drooni.
Västid etikuávdáškoccee koččâmuššáid já tooimâ adelum ravvui miäldásávt.
Torvolâšvuotâtilán lohtâseijee tiäđustâllâmsuáituid ij koolgâ suáittiđ etinumerân 112.
Tooimâ tánávt, jis kaavnah koččâm drooni tâi uáináh kirdee drooni
Jis tun kaavnah enâmist iäpádettee drooni tâi ton oosijd, te sirduu torvolii kooskâ kiäčán já suáiti etinumerân 112. Västid etikuávdáškoccee koččâmuššáid já tooimâ adelum ravvui miäldásávt. Ele tipte iärásijd moonnâđ kavnum tiiŋgâ alda. Ele jyevi jieijâd sajaduv tâi kove droonist sosiallii mediast.
Jis aaicah drooni kriittisii infrastruktur aldasijn tâi kirdemkiälduvijđoduvâst, te árvuštâl tile já nuávdit várugâsvuođâ. Suáiti táárbu mield etinumerân 112 já almoot aiccâmušâst. Västid etikuávdáškoccee koččâmuššáid já tooimâ adelum ravvui miäldásávt. Visásmit jieijâd torvolâšvuođâ já sirduu táárbu mield siisâ aldemuu viistán meddâl uuvsâi já laasâi aldasijn. Čuávu virgeomâhái viestâdem.
Tiäđuh já tááiđuh láá tehálâš uási rahttâtmist. Tust lii vissásub já torvolub tobdo, ko tiäđáh maht toimâđ jieškote-uv tilálâšvuođâin.